Presidentja e Kosovës Vjosa Osmani dhe presidenti i Serbisë, Aleksandër Vuçiç, të enjten mund të zhvillojnë një takim bilateral në kuadër të Komunitetit Politik Evropian në Granada të Spanjës.
Osmani e Vuçiç do të marrin pjesë në Samitin e Tretë të Komunitetit Politik Evropian i planifikuar të mbahet me 5 tetor të këtij viti.
Sipas gazetës prestigjioze britanike, “The Guardian”, liderët evropian në margjinat e këtij samiti do të bëjnë përpjekje për të bërë bashkë Osmanin e Vuçiç-in për të diskutuar mbi situatën e tensionuar në Veri pas ngjarjeve në Manastirin e Banjskës.
“Burimet tona thonë se ka përpjekje për t’i futur Osmanin e Vuçiç-in në të njëjtën dhomë pavarësisht armiqësisë politike midis dy vendeve”.
Fokusi kryesor i samitit synohet të jetë pushtimi rus i Ukrainës në vitin 2022 , lëvizshmëria e të diplomuarve dhe inteligjenca artificiale.
Megjithatë në takim pritet të diskutohen edhe mbi marrëdhëniet e tensionuara në mes të Kosovës dhe Serbisë.
“Pritet që dinamika e tensionuar mes dy shteteve e cila është si rezultati i sulmit në Banjskë të jetë një temë kryesore e diskutimit”, thuhet në agjendë.
