Korrupsioni është prezent gjithandej, nëpër institucione shtetërore e arsimore, përkatësisht te profesorët por dhe te studentët dhe ky është një ndër faktorët që ndikon në cilësinë e arsimit të lartë në vend. Kështu u konstatua në debatin e organizuar nga Instituti për Demokraci. Sipas një hulumtimi në konviktet studentore, 40 për qind e studentëve janë ballafaquar me korrupsion, ndërsa 29 për qind nuk e dinë se ku ta denoncojnë këtë dukuri.
“Në thelb kur e shohim korrupsioni është prezent gjithandej, edhe nëpër institucione, institucionet e arsimit të lartë, institucionet shtetërore… Korrupsioni është prezent edhe tek profesorët dhe kuadri teknik, i dimë shitjet klasike të librave, në këmbim të notës më të lartë, por njëkohësisht korrupsioni është edhe tek studentët…. ”, u shpreh Teodora Stolevska, Këshilli Arsimor për të rinjtë MOF.
“Listat e ndryshme të vlerësimit, të asaj se ku ndodhen universitetet tona krahasuar me universitetet e tjera në botë, tregojnë për cilësinë e arsimit të lartë në vend. Korrupsioni është një prej faktorëve që ndikojnë për rezultatin e keq, ose rezultatin e keq krahasuar me vendet e tjera të rajonit”, tha Misha Popoviq, Instituti për Demokraci.
Kryetarja e Komisionit Antikorrupsion, tha se nga denoncimet e bëra, rezulton se nëpër universitete ka selektim negativ, nepotizëm dhe klientelizëm.
“Nga denoncimet e shumta që i marrim në pjesën e arsimit të lartë, del që atje ekziston selektim negativ, ekziston nepotizëm, klientelizëm, ka raste të shumta që ka zgjedhje të titullit të mësimdhënies shkencore, pa u plotësuar kushtet dhe më pas ai që është i zgjedhur ashtu, i zgjedh të tjerët dhe kështu zinxhiri vazhdon. Pra vërtet një pasqyrë jo e mirë, të mos them e keqe”, deklaroi Biljana Ivanovska, Komisioni Antikorrupsion.
Pjesëmarrësit u pajtuan se duhet vendosur mekanizma për informim të kuadrit akademik dhe studentëve për denoncimin e korrupsionit. /Alsat.mk
