Inteligjenca ushtarake ukrainase publikoi së fundmi audioincizimin që ata pretendojnë se është një telefonatë e përgjuar, në të cilën një ushtar rus akuzon komandantët e tij se kanë vendosur ushtarë të sëmurë rëndë nga njësia e tij në vijën e frontit për të shërbyer si “mish për top”.
Audioincizimi fillimisht u publikua nga Drejtoria e Inteligjencës Ushtarake e Ukrainës (GUR) në kanalin e saj Telegram më 30 janar. E nga ministria ruse e Mbrojtjes nuk ka komentuar ende asgjë, transmeton Telegrafi.
GUR publikon shpesh audioincizime të atyre që thotë se janë komunikime të përgjuara që përfshijnë trupat ruse. Thirrjet zakonisht shërbejnë si shembuj të moralit të ulët midis forcave të presidentit rus Vladimir Putin në Ukrainë.
Në dhjetor, GUR publikoi një video të dy ushtarëve rusë që shprehnin zhgënjimin e tyre me luftën duke folur për udhëheqjen e një rebelimi kundër Kremlinit.
Në përshkrimin e incizimit të fundit, agjencia e inteligjencës identifikon ushtarin duke folur si një anëtar i Brigadës së 5-të të Motorizuar të Rusisë.
Sipas një përkthimi nga Kyiv Post, ushtari tha se ushtarët e njësisë së tij, të cilët vuanin nga sëmundje të rënda si tuberkulozi dhe HIV, u urdhëruan të luftonin para njerëzve të shëndetshëm.
Në një bisedë me një person tjetër, i cili nuk është identifikuar, ushtari tha se komandantët “humbën gjithë kompaninë e ndyrë, i vranë të gjithë… u hodhën si mish, si mish për top”.
Ushtari që flet thotë se ai vetë vuan nga HIV dhe se shumë ushtarë të thirrur nga rajoni ushtarak jugor i Rusisë, Rostov-on-Don janë të sëmurë rëndë.
“Kështu që këtu janë 16 persona që kanë hepatit, të dyshuar për tuberkuloz, sëmundje të mushkërive, tumore në kokë”, tha ai.
Ai shtoi se ushtarët që luftuan në vijën e frontit dhe mbijetuan, më vonë vihen në shërbim rezervë pa marrë mbështetje financiare.
“Pas dy ditësh erdhi një djalë, nuk e kam parë kurrë, thotë: “Burra, po të shkruani një raport tani dhe të thoni në të që nuk keni kundërshtime për udhëheqjen e këtij batalioni, shkoni në shtëpi. Por mbani mend, ju nuk do ta shihni pagesën tuaj për janarin”, tha ai.
“Mendova, dreq. Nuk do ta merrja as atë rrogë”, vazhdoi ushtari.
“Më bërtitën në fshatin Novotroitsk se po ndëshkohesha dhe se do të më kthenin në front”, tha për fund ai.
