“Situatë relativisht e qetë” dhe “deri më tani”, janë fjalët që përdor kreu i Aleancës për Shqiptarët Arben Taravari i pyetur për lëshimin eventual të koalicionit VLEN nga ana e tij. Ai nuk deshi të komentojë më shumë.
“Në koalicionin VLEN situata është relativisht e qetë dhe në koalicionin qeveritar gjithçka është në rregull deri më tani”, tha Arben Taravari, VLEN.
I pyetur nëse Taravari do të vazhdojë të jetë pjesë e VLEN, nuk e përcaktoi ai kreu i Besës Bilall Kasami. Sipas tij, fuqia e subjekteve që janë pjesë e koalicionit buron pikërisht nga të qenit pjesë e tij. Kasami tha se brenda koalicionit janë dakorduar një pjesë e mirë e komunave dhe emrave konkret me të cilat do të garojnë, përfshirë ata të partisë së Taravarit, kurse mbeten vetëm disa çështje të tjera për t’u definuar.
“Unë nuk mundem të bëj ndonjë vlerësim sepse bëhet fjalë për një qëndrim të një subjekti tjetër dhe të një lideri tjetër por unë vlerësoj se shqiptarët votuan koalicionin VLEN për t’i përfaqësuar në qeveri dhe për të vazhduar misionin të cilin na e kanë ngarkuar edhe në zgjedhjet lokale. Besoj se suksesi i çdonjërit nga subjektet politike ndërlidhet drejtpërdrejt me bashkimin tonë në kuadër të koalicionit VLEN. Ka pasur mendime ndryshe. Besoj se pjesën më të madhe të këtyre mendimeve ndryshme i kemi harmonizuar. E fundit që ka ngelur si çështje për t’u harmonizuar është qëndrimi i ASH-së që të shikohet edhe mundësia që listat për këshilltarë të ketë edhe kombinatorika të tjera dhe jo vetëm si koalicion VLEN”, deklaroi Bilall Kasami, VLEN.
Ka reaguar edhe kreu i Alternativës Zeqirija Ibrahimi shkruan në formën e porosisë që VLEN nuk mund të jetë kalkulator për përfitime. Qytetarët thotë ai, kërkojnë përgjigjen e njëjtë nga VLEN edhe në zgjedhjet lokale.
“VLEN-i nuk është dhe nuk duhet të jetë një kalkulator që e llogarit mënyrën e përfitimit të pushtet. VLEN-i është përtej kësaj – ky koalicion është përmbysje e një regjimi që për 22 vjet ishte përfaqësimi më i dobët për shqiptarët, që në fund u metaforizua me qendra tregtare si Soravia dhe me listën e zezë amerikane të personave non-grata. Prandaj, në VLEN debatet për numra, për përqindje dhe për “kulaç” kanë qenë dhe mbeten çështje periferike. Në zgjedhjet e kaluara qytetarët shqiptarë na besuan për këtë dhe na mandatuan. Edhe zgjedhjet e ardhshme e kërkojnë përgjigjen e njëjtë”, u shpreh Zeqirija Ibrahimi, VLEN.
Jozyrtarisht, siç ka raportuar Alsat, Taravari në takimin e fundit të liderëve të VLEN ka dhënë sinjalet e para se pas 6 prillit mund t’i jep drejtim tjetër përcaktimit tij politik. Ai ka kërkuar mirëkuptimin e liderëve të tjerë duke thënë se në Kuvendin e partisë do të vendosë se si tutje. Në rrethana jo zyrtare, mësohet se Taravari kërkon të paktën 40 për qind të kandidatëve për komuna.
