Përplasja mes Antikorrupsionit dhe Akademisë së Gjyqtarëve, e cila i ka pranuar 130 dëgjues gjatë periudhës zgjedhore, sipas profesorit universitar Bashkim Selmani, është më tepër për interesa personale të pushtetmbajtësve se sa problem real.
Gjatë ditës së djeshme, Antikorrupsioni ngriti iniciativë kundër, drejtoreshës së Akademisë së Gjyqtarëve dhe Prokurorëve, Natasha Gaber Damjanovska dhe Bordit Drejtues, pasi sipas tyre, me pranimin e dëgjuesve në kohën e fushatës elektorale janë shkelur Ligji për Parandalim të Korrupsionit dhe Konflikt të Interesave, por edhe Kodi Zgjedhor.
“Është fakt se, unë nuk e di a ka institucion në Maqedoni që është e pavarur, mirëpo gjithmonë në këto raste bëhen publike kur ka përplasje mes interesave të pushtetmbajtësve, për të afërmit e tyre. Dhe pikërisht këtu është përplasja, më tepër është çështje personale mes institucioneve se sa problemi real”, deklaroi Bashkim Selmani, profesor universitar.
Zgjidhjen e konfliktit, Selmani e sheh te një i hetim i pavarur dhe revizioni i përzgjedhjes së 130 dëgjuesve apo kandidatëve potencial për gjykatës dhe prokurorë.
“Do të ishte mirë që për rastet e tilla publike të fillohet hetuesia dhe vetëm hetuesia është ajo që do t’i nxjerrë dhe faktizojë të gjitha faktet që fatkeqësisht të gjitha këto institucione në vete ose në mënyrë të heshtur kanë elemente kriminale të cilat duhet t’u bëhet një revizion dhe të hapet lëndë dhe të shqyrtohet dhe faktizohet themeli i fajësisë apo pafajësisë. Vetëm atëherë do të jenë të sigurt edhe publiku, por edhe vetë institucioni do të bëhen të pavarura siç e parasheh legjislacioni”, tha Bashkim Selmani, profesor universitar.
Kjo është hera e dytë që Antikorrupsioni ngrit iniciativë për të njëjtën lëndë. Në iniciativën e parë, Akademia e paditi Antikorrupsionin në Gjykatën Administrative dhe e fitoi procesin gjyqësor.
