Projekt-rezoluta për të vendosur një ditë ndërkombëtare për përkujtimin e gjenocidit në Srebrenicë është dërguar në Asamblenë e Përgjithshme të OKB-së për votim, tha përfaqësuesi i përhershëm i Bosnjës dhe Hercegovinës në OKB.
“Pas disa raundeve konsultimesh gjithëpërfshirëse, drafti përfundimtar i rezolutës “Dita Ndërkombëtare e Kujtimit dhe Përkujtimit të Gjenocidit të Srebrenicës 1995” nga Grupi Qendror Ndërrajonal i është dërguar Presidentit të Asamblesë së Përgjithshme të OKB-së Dennis Francis dhe të gjitha misioneve të përhershme në OKB”, ka shkruar në rrjetin social X më parë i njohur si Twitter, përfaqësuesi i përhershëm i Bosnjës dhe Hercegovinës në OKB, Zlatko Lagumdžija.
Në korrik 1995, më shumë se 8,000 burra dhe djem myslimanë boshnjakë u mblodhën dhe u vranë nga forcat serbe të Bosnjës në Potoçari pranë qytetit lindor të Srebrenicës, vrasja më e madhe masive në Evropë që nga Lufta e Dytë Botërore.
