MPB ka njoftuar se me 23.08.2024, rreth orës 22:00, zyrtarët e policisë nga Sektori për Punë të Brendshme Tetovë dhe Departamenti për Operacione Speciale Policore, pas marrjes së informacioneve operative se L.M. (41) nga fshati Gajre, Tetovë, i dyshuar për vrasje më 05.07.2024 dhe i kërkuar gjithashtu për arratisje nga Spitali Psikiatrik Bardovcë, ndodhej në fshatin Gajre, ndërmorën masa dhe aktivitete për arrestimin e tij. Pas sigurimit të urdhrave për kontroll në tre shtëpi në Gajre, gjatë kontrollit në një shtëpi në pronësi të Z.M., u gjet L.M., i cili ishte i armatosur me një pushkë automatike dhe rezistoi ndaj urdhrave të zyrtarëve të policisë. Ai e armatosi dhe e drejtoi pushkën automatike drejt zyrtarëve të policisë, pas çka ata hapën zjarr. Pasi L.M. u neutralizua, u kërkua ndihmë mjekësore nga Ndihma e Shpejtë, dhe u njoftua edhe prokurori publik. Tek L.M. u gjet gjithashtu një pistoletë, karikatorë për pushkë automatike dhe plumba. Rreth orës 22:50, L.M. ndërroi jetë, dhe vdekja e tij u konstatua nga një mjek i Ndihmës së Shpejtë. Ekipet policore kryen inspektimin e vendit të ngjarjes, dhe me urdhër të prokurorit publik, trupi i të ndjerit u dërgua në repartin e mjekësisë ligjore në Spitalin Klinik Tetovë për autopsi.
MPB jep detaje për ngjarjen e djeshme ku mbeti i vrarë 41-vjeçari nga fshati Gajre
ARTIKUJ TË NGJASHËM
