Forcat izraelite thanë se një sulm në një kamp refugjatësh në Gazën veriore e ka vrarë një komandant të lartë të Hamasit përgjegjës për sulmin e 7 tetorit në Izrael. Hamasi, ndërkohë e ka mohuar këtë pretendim nga ana e forcave izraelite.
Sulmi në kampin e refugjatëve Jabalya ka lënë të vrarë një numër të madh njerëzish dhe shumë dëme katastrofike, sipas dëshmitarëve okularë dhe mjekëve atje. Një drejtor spitali vlerësoi se dhjetëra persona janë vrarë.
Izraeli e ka marrë përgjegjësinë për sulmin vdekjeprurës në kampin e refugjatëve Jabalya në Gazën veriore, me një zëdhënës të Forcave të Mbrojtjes të Izraelit që i quajti vdekjet e civilëve nga sulmet një “tragjedi lufte”.
Komunikimet janë ndërprerë përsëri në Gaza të mërkurën, thanë kompanitë e telekomunikacionit, ndërsa Izraeli vazhdon bombardimet dhe e ka zgjeruar operacionin tokësor, pavarësisht thirrjeve nga agjenci të shumta të OKB-së për një armëpushim humanitar. Nëntë ushtarë të tjerë izraelitë janë vrarë në Gazën veriore, kanë thënë autoritetet e Izraelit të mërkurën.
Një grup shtetasish të huaj dhe palestinezë të dyfishtë mund të jenë në gjendje të largohen nga Gaza menjëherë pasi autoriteti kufitar i Hamasit publikoi një listë me 400 individë që kërkuan të dilnin nga Rripi.
Të paktën 8,525 njerëz në Gaza janë vrarë në konfliktin e deritanishëm dhe më shumë se 21,543 janë plagosur, thotë Ministria e Shëndetësisë në Gaza.
Dhjetra ambulanca kanë filluar të lëvizin nga Egjipti përmes kalimit kufitar Rafah herët të mërkurën për t’i marrë palestinezët e plagosur nga Gaza, njoftoi televizioni shtetëror egjiptian. Pamjet e transmetuara në Qahera News, një kanal shtetëror, treguan një varg ambulancash të verdha të rreshtuara jashtë portës kufitare. Sipas televizionit shtetëror egjiptian, 81 palestinezë do të dërgohen në spitalet në Egjipt, në një proces të lehtësuar nga Komiteti Ndërkombëtar për Kryqin e Kuq.
Zyrtari i të drejtave të njeriut të OKB-së e ka përshkruar bombardimin e Gazës nga Izraeli si “një gjenocid që shpaloset para syve tanë”.
Në një letër të së shtunës, Craig Mokhiber, avokati për të drejtat e njeriut për një kohë të gjatë dhe drejtor i OKB-së në Nju Jork, tha se organizata ndërkombëtare duket “e pafuqishme për ta ndaluar” atë që ai pretendon se është një “rast tekstual i gjenocidit”. Letra u shkrua disa ditë përpara se Mokhiber të dilte në pension pas më shumë se tri dekadash me Kombet e Bashkuara.
Kim Song, ambasadori i Koresë së Veriut në Kombet e Bashkuara, tha të martën se raportet për përdorimin e armëve të Koresë së Veriut nga Hamas janë “thashetheme të pabaza”, njoftoi Agjencia e Lajmeve Yonhap. Washington Post raportoi se një dokument i Hamasit përfshinte udhëzime për përdorimin e granatave raketore të Koresë së Veriut.
“Disa vende perëndimore po përdorin një fushatë shpifëse kundër [Koresë së Veriut] për të lidhur me forcë krizën e Lindjes së Mesme me ne”, tha Song, sipas Yonhap.
Forcat e Mbrojtjes së Izraelit (IDF) të mërkurën thanë se kanë “goditur mbi 11,000 objektiva që i përkasin organizatave terroriste në Rripin e Gazës” që nga fillimi i luftës më 7 tetor.
Kjo është një mesatare prej më shumë se 440 goditje në ditë për 25 ditët e para të luftës.
IDF ka thënë në mënyrë të përsëritur se nuk po i shënjestrojnë civilët në bombardimet e pandërprera të Gazës në përgjigje të sulmit të Hamasit në Izrael më 7 tetor që la të vrarë 1,400 njerëz.
Forcat e Mbrojtjes të Izraelit (IDF) të mërkurën thanë se nëntë ushtarë të tjerë izraelitë janë vrarë gjatë operacionit të saj tokësor në vazhdim në Gazën veriore.
Shtatë nga trupat ishin anëtarë të brigadës Givati, e cila është e përqendruar në luftimin e terrorizmit, dhe dy të tjerët ishin pjesë e korpusit të blinduar, sipas IDF.
Këto vrasje vijnë pasi IDF-ja i konfirmoi të martën dy vdekjet e para të ushtarëve izraelitë në Gaza që nga inkursioni i saj tokësor të premten./Washington Post, CNN
