Lidhja Demokratike e Kosovës po kërkon themelimin e një Komisioni Hetimor Parlamentar lidhur me procedurat për furnizimin dhe menaxhimin me rezervat shtetërore si dhe keqpërdorimet dhe abuzimet e mundshme me rezervat shtetërore, nëpërmjet kualifikimit të procedurës si sekret shtetëror për furnizime të tilla.
Shefi i Grupit Parlamentar të LDK-së, Arben Gashi tha se duke pasur parasysh dyshimet për abuzime të mundshme, konsiderojnë që është e nevojshme të bëhet hetim i thelluar parlamentar.
“Ne deputetët nënshkrues e konsiderojmë si të domosdoshme që të kemi hetim parlamentar për të parë nga afër se sa janë respektuar ligjet dhe procedurat për çështjen e rezervave shtetërore si dhe të propozojmë hetimin e çështjeve në vijim”- tha Gashi.
Deputeti i LDK-së më pas ka prezantuar disa nga objektet e hetimit mbi këtë proces.
“A janë hapur tender për furnizimin me rezervë shtetërore? Në rast se kontrata e furnizimit të rezervave shtetërore janë klasifikuar si sekrete, cila është forma që është përdorur për klasifikimin e kontratave si sekret shtetëror dhe pse janë kualifikuar si të tilla? Çka është kualifikuar si sekret shtetëror, produkti, çmimi, vendndodhja, personat e përfshirë, kontratat si dhe a ka pasë certifikatë sigurie për personat të cilët kanë qenë të përfshirë në këto kontrata? Kush dhe si e ka menaxhuar këtë proces që nga fillimi deri në fund? “- ka renditur Gashi.
“Cila mund të jetë afërsia eventuale e përfituesve të këtyre kontratave me kryeministrin apo nivelet tjera politike? Deri në cilin nivel të hierarkisë së pushtetit arrijnë marrëdhënia eventuale e të përfshirëve përfituesve dhe njerëzve të tjerë me pushtet? Si dhe kush i ka përzgjedhur kompanitë fituese dhe me çfarë kritere? Kush janë përfituesit e tenderëve, si janë përzgjedhur, a i kanë plotësuar kushtet ligjore? A janë të pajisur me certifikatë sigurie i tërë sistemi tenderues, negociues, mbikëqyrës, furnizues, nëse po kur janë pajisur? A është shkelur ligji për rezervat shtetërore?”- shtoi tutje ai.
Gashi tha se përbërja e komisionit hetimor, propozohet të jetë me 11 anëtarë.
https://www.facebook.com/watch/?v=291796393566168 (LiveVideo)
