Kryeministri i Republikës së Kosovës, Albin Kurti, ka zbardhur detaje nga deklarata skandaloze e presidentit të Serbisë, Aleksandar Vuçiq, në takimin e 2 majit në Bruksel.
Përmes një postimi në rrjetin social Facebook, Kurti ka thënë se Vuçiq është i obsesionuar me komandantin legjendar të Ushtrisë Çlirimtare të Kosovës, Adem Jashari.
Sipas kryeministrit Kurti, dëshira e Vuçiq ishte që me sulmin terrorist të 24 shtatorit, ta shndërronte Manastirin Ortodoks të Banjskës në ‘Kullë të Jasharëve’ për serbët e Kosovës, ndërsa kishte thënë se nënkryetari i Listës Serbe i shpallur në kërkim nga Policia e Kosovës, Milan Radoiçiq, do të bëhet ‘Adem Jashari i serbëve’.
“Kosova është shtet demokratik dhe vend properëndimor: kush integrohet, jeton më mirë. Serbët në Kosovë nuk kanë nevojë për çlirim nga Republika e Kosovës por nga veglat terroriste të Serbisë.
Vuçiq është i obsesionuar me kryekomandantin e UÇK-së, Adem Jasharin. Ai dëshironte që me 24 shtator ta shndërronte Manastirin Ortodoks të Banjskës në “Kullë të Jasharajve” për serbët e Kosovës! Në takimin e 2 majit në Bruksel na tha që Millan Radojçiq do të bëhet Adem Jashari i serbëve. Por, duke qenë diktator, ai s’e kupton historinë: epopeja dhe çlirimi nuk fabrikohen dhe as s’kopjohen”, shkroi ai.
Krimineli serb, Radoiçiq, ishte pjesë e grupit terrorist që sulmoi Policinë e Kosovës në Banjskë të Zveçanit të dielën, ku si pasojë e të shtënave, mbeti i vrarë rreshteri i Policisë së Kosovës, Afrim Bunjaku.
Prezenca e tij në veri u konfirmua përmes pamjeve të kapura nga droni i Policisë, e të cilat u publikuan nga ministri i Brendshëm, Xhelal Sveçla.
“Ky në pamjet më poshtë është Millan Radoiçiq, nënkryetar i Listës Serbe, po ashtu pjesë edhe e listës së zezë të SHBA-së dhe Mbretërisë së Bashkuar”, shkroi Sveçla në përshkrimin e videos në Facebook.
Siç raportojnë mediat rajonale, Radoiçiq ka mbetur i plagosur nga shkëmbimi i zjarrit mes Policisë së Kosovës dhe terroristëve serbë.
Gjatë përleshjeve të armatosura me grupin terrorist, Policia vrau tre sulmues të nacionalitetit serb, ndërsa i arrestoi tetë të tjerë dhe ndaj tre prej tyre është shqiptuar masa e paraburgimit prej një muaji.
