Katër ministra të qeverisë në Japoni dhanë dorëheqjen të enjten pas skandalit për mbledhjen e fondeve që përfshin fraksionin më të fuqishëm të partisë në pushtet, shkruan BBC.
Më shumë se 3 milionë euro supozohet se kanë përfunduar në këto fonde gjatë një periudhe pesëvjeçare deri në vitin 2022.
Prokurorët e Tokios kanë nisur hetim për korrupsion.
Është goditja më e fundit për qeverinë gjithnjë e më jopopullore të kryeministrit japonez Fumio Kishida.
Mbështetja publike për Partinë Liberale Demokratike (LDP), e cila ka qenë në pushtet pothuajse vazhdimisht që nga viti 1955, ra nën 30% për herë të parë që nga viti 2012, tregoi një sondazh i NHK të martën.
Votuesit janë zemëruar nga inflacioni, si dhe nga trajtimi i skandaleve të mëparshme nga Kishid
Shefi i kabinetit dhe zëdhënësi i lartë i qeverisë, Hirokazu Matsuno, i parë shpesh si dora e djathtë e Kishidas dhe fytyra e qeverisë së tij, ishte më i shquari nga katër ministrat e dorëhequr. Ministri i Ekonomisë dhe Industrisë, Yasutoshi Nishimura, ministri i Punëve të Brendshme, Junji Suzuki dhe ministri i Bujqësisë, Ichiro Miyashita gjithashtu dhanë dorëheqjen të enjten.
Zëvendësuesit e tyre pritet të bëhen të ditur deri në fund të ditës.
Përveç kësaj, pesë zëvendësministra të lartë dhe një zëvendësministër parlamentar nga i njëjti fraksion, i udhëhequr më parë nga kryeministri i ndjerë Shinzo Abe, gjithashtu dhanë dorëheqjen.
Dorëheqjet masive tani e lënë LDP-në në situatë të pazakontë me mungesë të përfaqësuesve në fraksionin më të madh dhe më të fuqishëm brenda kabinetit qeveritar.
