Pasi Ziadin Sela në Kuvendin e partisë, paralajmëroi se me 18 shkurt do të mbahet Kongresi, në të cilin siç tha pritet shkarkimi i Arben Taravarit nga pozita e kryetarit të ASh-së, Taravari nga ana tjetër ka paralajmëruar kongres për ditën e sotme, transmeton Portalb.mk.
“Në bazë të nenit 31, pika 1, të Statutit të Aleancës për Shqiptarët, Kryetari i Partisë, Dr. Arben Taravari, ka thirrur Kongres të jashtëzakonshëm ditën e nesërme, e premte, 16 shkurt 2024, ora 19:00, në Aleksandar Palace në Shkup.
Ndryshimi Ka Nis!”, thuhet në njoftimin e partisë.
Kuvendi i Aleancës për Shqiptarët me në krye Ziadin Selën me 10 shkurt ngriti iniciativë për shkarkimin e kryetarit të ASh-së Arben Taravari. Me 18 shkurt është thirrur kongresi i jashtëzakonshëm i partisë, me të cilin do të marrë formë shkarkimi i kryetarit, tha Ziadin Sela, kryetar i Kuvendit Qendror të Aleancës.
“Pas një debati të gjatë dhe me votë nga ana e kuvendit nga prezenca prej 108 anëtareve të kuvendit, 106 pro, 1 kundër, 1 abstenim u mor i iniciativa për shkarkimin e kryetarit të partisë. Natyrisht një vendim tjetër është për thirrjen e Kongresit të jashtëzakonshëm, i cili u thirr më datë 18 dhe duhet të marrë formë shkarkimi i kryetarit. Ndërsa për pikën tjetër, për atë se si do të shkojë në zgjedhje ASh-ja, ai që bën propozim është kryetari i partisë. Kjo pikë u vendos që nuk mund të diskutohet pasi u mor iniciativë për shkarkimin e kryetarit të partisë”, tha Sela.
Ai tha se sa i përket garës në zgjedhje, ai tha se janë të mendimit që të shkojnë vetë.
Me 8 shkurt, nga ana tjetër u mbajt Kuvendi i Aleancës për Shqiptarët në Kumanovë nga lideri i partisë, Arben Taravari, i cili i ka dhënë mbështetje këtij të fundit për bashkëpunim parazgjedhor me opozitën shqiptare, në mënyrë që të angazhohet “për të çuar BDI-në në opozitë”.
Kujtojmë se Kuvendi mesnatën e 10 shkurtit, me 62 vota “për” dhe asnjë votë “kundër” i shkarkoi ministrat e Shëndetësisë dhe të Shoqërisë Informatike dhe Administratës, Fatmir Mexhiti dhe Azir Aliu. Në votim nuk morën pjesë deputetët e VMRO-DPMNE-së opozitare.
Mexhiti dhe Aliu janë shkarkuar me propozim të kryeministrit teknik Talat Xhaferi.
Ndryshimi i ministrave nga Aleanca për Shqiptarët ndodh pasi kreu i partisë Arben Taravari dhe kryetari i Kuvendit Qendror Ziadin Sela hynë në konflikt të hapur për koalicionin e mundshëm parazgjedhor me opozitën shqiptare. Sela mbetet në Qeveri, ndërsa Taravari i është bashkuar Lidhjes Evropiane për Ndryshim.
