Alijaj tani po merr mbështetje virtuale në fushatën zgjedhore. Ai dhe ekipi i tij kanë zhvilluar një avatar që flet për të. Ai duket si Alijaj dhe ka një zë të ngjashëm
Sa herë që Islam Alijaj dëshiron të thotë diçka para Këshillit Bashkiak të Cyrihut, atij i duhet ndihma e një asistenti që e shoqëron te foltorja dhe flet ose “përkthen” për të, transmeton albinfo.ch. Për shkak të paralizës cerebrale që ka kandidati i PS-së për Paralamentin e Zvicrës, ka vështirësi të ecë dhe të flasë.
Alijaj tani po merr mbështetje virtuale në fushatën zgjedhore. Ai dhe ekipi i tij kanë zhvilluar një avatar që flet për të. Ai duket si Alijaj dhe ka një zë të ngjashëm, shkruan blick.ch. Por, ai flet më rrjedhshëm dhe për këtë arsye është më i kuptueshëm.
Kur dikush nga ekipi i tij i fushatës kishte idenë e përdorimit të inteligjencës artificiale (AI) për të krijuar një avatar, ai qe shprehur i emocionuar, nga njëra anë, por skeptik, nga ana tjetër. Skeptik sepse ai kishte konstatuar tashmë se softueri i zakonshëm i njohjes së zërit si Siri i Apple nuk e kuptonte atë.
Por skepticizmi u zhduk shpejt. Është dashur vetëm një video për të regjistruar atë dhe zërin e tij, thotë Alijaj. Kjo më pas u shndërrua në një avatar me një zë sintetik, duke përdorur Inteligjencën Artificiale gjeneruese, përcjell albinfo.ch. Ai tani thjesht mund të shtypë atë që dëshiron të thotë – dhe avatari e kthen tekstin në të folur. Janë krijuar pesë video, në të cilat Alijaj prezanton qëllimet e tij zgjedhore.
Avatari ende flet gjermanishten standarde. Por, një variant zvicerano-gjerman është gjithashtu teknikisht i mundshëm, sipas Alijajt.
Për Alijajn, e gjithë kjo nuk është vetëm një lojë dëfryese. Përkundrazi, ai e sheh këtë si një mundësi të madhe për njerëzit me aftësi të kufizuara si ai.
“Ëndrra ime e madhe do të ishte një zgjidhje teknike që do të mund të interpretonte për mua njëkohësisht dhe të më bënte të pavarur nga asistenti im i të folurit”, transmeton albinfo.ch. Kjo jo vetëm që do t’i jepte Alijajt pavarësinë, por edhe do të lehtësonte barrën e madhe financiare.
Me 170,000 franga, anëtari i PS-së ka një nga buxhetet më të larta të fushatës në kanton. Dhe, një pjesë e madhe është shpenzuar për ndihmë gjuhësore, thotë Alijaj.
