Kopenhagë, 28/08/2025
Konsullata e Republikës së Kosovës në Kopenhagë gjat javës që kaloi organizoi një aktivitet të veçantë rrjetëzimi në fushën e Teknologjisë së Informacionit dhe Komunikimit (TIK), me synim forcimin e marrëdhënieve ndërmjet komunitetit të TIK-ut në Kosovë dhe atij në Danimarkë.
Ngjarja bashkoi inovatorë, profesionistë dhe partnerë të përkushtuar për të avancuar bashkëpunimin teknologjik mes dy vendeve. Diskutimet u përqendruan në mundësitë e krijimit të partneriteteve të reja, shkëmbimit të njohurive dhe eksplorimit të tregut danez si një hapësirë e rëndësishme për zhvillimin e kompanive kosovare të teknologjisë.
“Ky aktivitet dëshmon rolin e rëndësishëm të diasporës sonë në krijimin e urave të reja bashkëpunimi dhe në forcimin e marrëdhënieve ekonomike e profesionale mes Kosovës dhe Danimarkës,” u theksua gjatë takimit. Një falënderim i veçantë iu drejtua znj. Vjollca Cavolli, Drejtore Ekzekutive e STIKK, si dhe përfaqësuesve të DAX Group, Kosbit dhe Incodex, të cilët me angazhimin dhe përkushtimin e tyre treguan gatishmëri për të eksploruar mundësitë që ofron tregu danez.
Ngjarja u vlerësua si frymëzuese dhe u pa si një pikënisje për dialog të ri dhe bashkëpunim më të ngushtë në sektorin e teknologjisë ndërmjet dy vendeve. Konsullata shprehu përkushtimin për të vazhduar këtë proces dhe për të hapur rrugë të reja bashkëpunimi në të ardhmen.
