Deputeti i koalicionit VLEN, Adnan Azizi, ka reaguar ashpër ndaj liderit të BDI-së, Ali Ahmeti, pas qarkullimit të një videoje ku ky i fundit shihet në shoqëri me një person të njohur për sjellje kontroverse. Sipas Azizit, kjo video është “pasqyra më e qartë e mënyrës se si Ali Ahmeti ka udhëhequr me fatin e fëmijëve shqiptarë”.
“Në këtë zgërdhime të Ahmetit me një figurë që i madh e i vogël e njeh si të krisur, u zbulua plotësisht ai që për vite të tëra është paraqitur si udhëheqës i shqiptarëve. Shqiptarët i kanë borxh një falënderim figurës tragji-komike që zbuloi fytyrën e vërtetë të Ali Ahmetit”, deklaron Azizi.
Deputeti i VLEN-it shkon edhe më tej, duke akuzuar liderin e BDI-së se është “anëtar i fshehur i Lëvizjes së Deçanit” me “prapavijë të pastër serbe”, që sipas tij synon përçarjen e trungut kombëtar dhe fetar të shqiptarëve në Maqedoninë e Veriut.
“Ali Ahmeti jo vetëm që i ka katandisur për tokë të gjitha punët e shqiptarëve, por ka punuar me zell për ta lënë edhe Medresenë Isa Beu pa akreditim – jo nga halli i ligjit, por për ta përdorur fenë si karrem elektoral”, shton Azizi.
Në fund të reagimit të tij, ai akuzon drejtuesit aktualë të BDI-së për tallje me vlerat fetare dhe mashtrim të besimtarëve: “Zoti nuk ta merr shpirtin pa ta marrë fytyrën. Kur je zullumqar, do të nxjerrë para popullit ashtu siç je!”./ Zyrtare.net
