Të paktën 33 palestinezë u vranë dhe një numër i madh u plagosën në sulmet ajrore dhe tokësore izraelite në pjesë të ndryshme të Rripit të Gazës gjatë natës.
Sipas agjencisë zyrtare palestineze WAFA, burime shëndetësore konfirmuan se 33 persona, mes tyre fëmijë dhe gra, kanë mbetur të vrarë dhe dhjetëra të plagosur si pasojë e bombardimeve të dhjetëra shtëpive në Gaza në orët e para të mëngjesit.
Forcat izraelite sulmuan gjithashtu zona të ndryshme të Khan Younis në jug të Rripit të Gazës dhe kampet e refugjatëve Burayj dhe Al-Maghazi në pjesën qendrore me zjarr të fortë artilerie.
Për shkak të sulmeve të vazhdueshme izraelite, shërbimet e komunikimit dhe të internetit në Rripin e Gazës janë ndërprerë plotësisht për katër ditë.
Izraeli ka nisur sulme të pamëshirshme ajrore dhe tokësore në enklavën palestineze, duke shkatërruar pjesën më të madhe të enklavës së ngushtë bregdetare në hakmarrje për një sulm ndërkufitar nga grupi palestinez Hamas më 7 tetor.
Prej atëherë, të paktën 23.968 palestinezë janë vrarë, duke përfshirë 10.300 fëmijë dhe 7.100 gra.
Sipas Kombeve të Bashkuara (OKB), për shkak të sulmeve vdekjeprurëse, 85 për qind e popullsisë së Gazës është zhvendosur brenda vendit.
