Mbrojtja ajrore ukrainase ka vepruar në orët e hershme të mëngjesit në kryeqytetin Kiev, duke u përballur me një sulm të kombinuar rus me dronë dhe raketa. Sipas agjencisë Reuters, dëshmitarët raportuan një seri shpërthimesh të fuqishme.
Sipas informacioneve paraprake, kanë humbur jetën nëntë persona dhe 63 janë plagosur, prej të cilëve 42 janë shtruar në spital, përfshirë edhe gjashtë fëmijë.
Godina banimi janë shembur dhe po vijon kërkimi për njerëz nën rrënoja. Ekipet e Shërbimit Shtetëror për Ndihmë Emergjente janë në terren me qen kërkimi.
“Po zhvillohet një sulm i kombinuar. Rreziku mbetet i lartë,” shkroi në Telegram Timur Tkachenko, kreu i administratës ushtarake të qytetit të Kievit. Ai gjithashtu theksoi se janë regjistruar zjarre dhe mbetje të avionëve dhe raketave në dy lagje në perëndim të lumit Dnieper, që kalon përmes qytetit.
Kryetari i Kievit, Vitali Klitschko, deklaroi se dronë fluturonin mbi zonat qendrore të qytetit, duke urdhëruar ekipet mjekësore të shkojnë menjëherë në disa pjesë të qytetit. Sipas tij, banorët e një ndërtese kanë mbetur nën rrënoja. Zjarre dhe mbetje metalike të raketave janë vërejtur edhe në lagje të tjera të Kievit.
Edhe qyteti i Kharkivit, i dyti më i madh në Ukrainë, u godit rëndë në mëngjes nga një sulm me raketa, shkroi në Telegram kryebashkiaku Igor Terekhov. Ai tha se janë dëgjuar disa shpërthime në qytet, i cili shpesh është shënjestër e sulmeve ruse.
