Ministri i Shëndetësisë, Arben Taravari ka bërë të ditur se 84 pacientë janë duke u trajtuar në Klinikat në Shkup, nga rasti tragjik që ndodhi të dielën në Koçan, përcjell TV21. Taravari tha se edhe 51 pacientë të tjerë janë duke u trajtuar jashtë vendit, ku gjatë ditës pritet që edhe disa të tjerë të dërgohen. Gjithashtu, ministri tha se pasi janë liruar kapacitetet, të gjithë të lënduarit janë duke u trajtuar në Klinikat e Shkupit dhe nuk ka pacientë në Shtip ose Koçan.
“Deri tash në klinikat e Shkupit ka 84 pacientë. Strategjinë e ndryshuam. Dje të gjithë pacientët prej Koçanit dhe Shtipit i morëm këtu pasi 51 pacientë tashmë janë jashtë vendit. Unë kisha dashur edhe njëherë të tregoj se në Turqi janë 9 pacientë, në Bullgari 14, në Greqi 5, në Serbi 17, në Hungari 2 dhe në Rumani 4. Sot shpresojë që shkon edhe një fluks i pacientëve, në Slloveni 4, në Kroaci 4, në Austri 6 dhe në Beograd edhe 12 pacientë. Gjithashtu ka disa raste të reja, të cilët pacientë dje nuk janë paraqitur aspak te mjeku po sot kanë paraqitur simptoma të caktuara dhe janë paraqitur 2 pacientë në Shtip. Pasi u shprazën kapacitetet këtu, i kemi nën kontrollin tonë këtu në Shkup. Shpresoj që sot të formsojmë edhe ekipet psikologjike të cilët do të japin përkrahje për pacientët por edhe për familjet prej rastit tragjik që ndodhi në Koçan”, tha Taravari.
